Beaivvášsuonjardeamis šealggáhallá riebangolli dego aitto gellojuvvon silba, ja lea danin adnon buhtadussan juste silbba sajis. Sápmelaččat leat guhkesáiggi juo atnán riebangolli čikŋan.

[layerslider id=”24″]

 

Riebansilba lea minerála man gávdnat riebansilbba báktešlájas. Báktešládja lea dimis ja sovttas, ja leat asehaš gearddit badjálaga. Gearddit šealgádit dego silba, ja heivejit danin bures čikŋan. Minerála lea maiddái gohčoduvvon geafesolbmuid silban.

Minerála gierdá alla temperatuvrra, ja lea danin árabut adnon ommanlásen, ja maiddái eará elektrihkalaš buktagiin.

Mii gávdnat čilgehusaid mat duođaštit riebangolli anus sámi bivttasčikŋan ja lassireaidun nu árrat go 1700-logus. Boahkánat, gákteroahkit, dorkaravddat, veaskkut, giissát jna, čiŋahuvvojedje riebansilbbain.

Váldon adnui fastten

Teknihkka mas gorro riebansilbbain lei guhká jávkan min guovlluin. 80-logus teknihkka fas ealáskahttojuvvui go barge prošeavttain mas  ealáskahtte dološ bivttasárbevieruid. Ivgu dievdogávtti raddi, raddeleahppi ja krávva čiŋahuvvui riebansilbbain.

Teknihkka mearkkaša ahte ráiget láđis dahkkon čikŋabihtáid. Ráiggiid duogábeallái bidjet riebansilbabihtáid, dasto applikerejit láđi gitta válljejuvvon vuložii.